Title: Sechet lieben Herrn das müß ich lachen / Das ich die alten weyber jung kan machen. ; Caption: Eins mals ich mit eim grosse her / Wolt faren über das breit Mer / Mit Kauffleüten wir wol bekant / Die heten gschäfft in Isslandt / Inn dem da kam ain grosser windt / Und schlüg das Schiff also geschwint / Inn ain Insel mir unbewisst / Die Senecla genennet ist / Wie mann sy uns dann nennen thet / Von aim der drinn gewandelt het / Die Insel was hundert meil brayt / Diss volck waren nit Christen lewt / Inn diser Insel wir aldar / Müsten bleiben ain fürtel jahr / Biss wir wider kamen herauss / Uber das wildes meres strauss / Wir sahen seltzam abentheür / Ein grossen ofen bran mit feur / Ein maister het vil gsind on mass / Der bey dem feur anschaffner was. // Mit wol riechenden negellein / Zymat Ziperes haitzten sy ein / Ich sach ain zal vil alter weib / Die machten sy wider von leib / Gar sein jung allsam schön baldt / Dann sy waren unglaublich alt / Gantz wägen kären man volbracht / Die der maister vom Newen macht / Die mann kamen hetten kain rhü / Drügen sy auff den rugkhen zü / Gar alte weib die kaine kundt / Weder geen noch steen/die er gunt / Mit seinem gferdt sein formiern / Sam ainer zwaintzig jernig diern / Gantz schön vonn leib/subtil gar / Liechte Augen ain goldfarbs har / Da ich arbayt schawet an / Fragt ich die so bei thäten stan / Sampt meine gsellen umb dise ding / Wies möglich wer und es zü gieng // Da waren wir der sach bericht / Allain es nun bey in geschieht / Das feur hab also die natur / Das alte ding jung drinnen wur / Was man drein werff das mach alda / Der Got des Feurs haist Ulcana / Ire weiber werden in gar / Alt/siben acht neün hundert jar / Wann sy vor alter mügen nit / Uleanus sy dan wider Schmidt / Ich sprach der weiber wöl wir auch / Ein haim fihren dann diser brauch / Ich nie han gsehen noch erhört / Der sprach/bald sy auff dem Mör fort / So stirbt sy/dann die frembden lüfft / Sein unser schad und grosses gift / Unser Insel glaubt gewiss / Ist der schlissel zum paradiss / Also es uns darinnen güng / Kum erst rauss bring die newzeittung.